2002

A Schwätzle uff’em Marktplatz


(Dialog zwischen Walpurga und Walhalla – mr sotds am beschta zu zwoit mit vrdoilte Rolla lesa!)


Narrenzunft Wendlingen e.V.Walpurga: Ja jetzat, Walhalla, bisch heit au uff’em Markt.

Walhalla: Jojo, wem’r nix hoimbrengt, geits au nix zom beisa! Abr, hosch scho ghert, ‚’d Wendlenger Narra hend dia neia Figur auf a Wellness-Farm gschickt, jetzt isch vorällem d’Visage ond dr ganze Meggl renoviert!

Walpurga: Es isch jo a ganz a freindlicher Narr, der Wen(U)boi, au we’mr den Noma grad no so aussprecha ka.


Walhalla: Also freindlich kasch do nemme saga, so wia der dr Lätsch auf dr oina Seit nahengt.

Walpurga: Jetzt muasch et vo dir ausganga! Do duasch denne orecht, schee schwätza ka mr au mit denne.

Walhalla: Des ka et sei, dia hend doch a ganz zuazogana Gosch! Geizig send se au no, mit denne Säckla ond Bendala ibrall.

Walpurga: Was hoist do Geiz! Mr muas sei Sach beianandrhalta, des duasch du doch au!

Walhalla: Jo, aber mir dend doch au amol feschta, umtreiba ond a nette Hockatse macha, et so wie dr andr Stadttoil, bei denna goht doch om Achte ‚s Drottwar nauf, weil älle scho em Bett schtragged.

Walpurga: Also, I fend, des isch heid nemme so, jo ‚s geit do scho no de Roigl ond dort die Sackbendl, aber mr hot sich au a’anandr gwehnt, ond ‚sgeit au a baar Sembatische auf boide Seita. Ond vo boide isch ebbes en derra Visage vom Wen(U)boi zom säha. Du muasch halt blos recht nogugga.

Walhalla: I han dia aber des Johr no garet g’säa.

Walpurga: Do muasch halt am Schmotziga fria om Segse deine Ohra aufsperra ond vor’d Tir ganga, no kasch se säa, wie se mit dene Nelau-Hexa älle Narra weckat.

Walhalla: Ond no…?

Walpurga: Ond no isch Fasnet en Wendling! Se verrotat jo no net älles, aber iber dr Dag verdoilt wird no weiter gnarrt.

Walhalla: I schick meine Jonge om viere (sächzehn Uhr) scho auf dr Marktplatz. Do geits en Waggl fir die Jonge!

Walpurga: Au ja, do gang i au no!

Walhalla: Ha, aus dem Alter soddascht abr scho raus sei. Des isch blos fir Kendrgartakendr ond die aus dr Grondschual. Fir älle Jonge ond ons geits jo no dr Rothaussturm om segse (Achtzehn Uhr)

Walpurga: Also des lass i net naus. Dia Narra machat ebbes zum Schmonzla ond Schonkla für älle, groß ond klei.

Walhalla: Ond s wird au a bissle romgoscht ond auf dr Boscha ghaua, do geits jo a baar Sacha, wo mr sei Gosch et halda derf!

Walpurga: Ond hendrher gohts ab end Tiefgarasch zom Fescht mit em Em-vau-uH ond seiner guta Blechspuckrmusik.

Walhalla: Jo, so a zemftigs Humta isch emmr schee. Ab Zehne wird au no a moderne Musik gspielt, woisch, so wia auf dene Schi-Hitta, so als Après-Narretei.

Walpurga: Ond du gohsch do no ond gugsch dir die neia Visaasch vo denne Wen(U)boi a, dia send dr ganze Obad au do onda ond helfat feschda.

Walhalla: Also, no bisch zom Schmotziga, i muas jetzt hoim, sonscht goschat meine Jonge.

 
 
Blättle: Das Neue an der Wendlinger Fasnet...
Zeitung: Erstmals tagt das Wendlinger Narrengericht